Stjórn Seðlabankans og stjórnarskráin

Það var athyglisvert að sjá, hvað erlendir fjölmiðlar töldu hafa valdið stjórnarslitum Samfylkingar og Sjálfstæðisflokks. Það var að ennþá var sama stjórn í Seðlabankanum. Hvers vegna er þá verið að tala um ágreining um forsætisráðherrastólinn? Er það ef til vill vegna þess að Seðlabankinn heyrir undir forsætisráðherrann og að það er eina leiðin til að setja stjórn bankans af að skipta um forsætisráðherra?

Stjórnmálamenn eru bjartsýnir um að geta breytt stjórnarskránni þannig, að hægt verði að kjósa um ESB-aðild í vor jafnframt því að taka á efnahagsmálum einstaklinga og fyrirtækja. Það er gott að vera bjartsýnn. Stjórnarskráin var ekki samin í neinni skyndingu, en rétt er að reyna að endurskoða hana á þessum skamma tíma og láta síðan breytingatillögurnar hvíla sig í sumar þar til þing kemur saman í haust. Margt kann að birtast okkur með nýjum hætti eftir sumarið og við fáum fleiri sjónarhorn. Vonandi fara menn ekki að reyna að gera hana svo skýra að hún lengist að mun, því að reynslan er sú, að því lengri sem stjórnarskrár eru því verri eru þær og lýðræði minna.